Pogradeci është tronditur të shtunën e 10 gushtit, kur pas një grushti në fytyrë, ra pa jetë në tokë Egli Proga. 42-vjeçari, baba i dy fëmijëve, u godit me grusht nga 29-vjeçari Denis Meçe, pas një sherri, që në fakt... arsyet mbeten ende në mjegull. Familjarët deklarojnë se ai është vrarë nga dora e Meçes, teka hidhen dyshime se ky i fundit ka dashur që t’i “vendosë gjobë” dhe i ka kërkuar xhiron ditore të lokalit që viktima kishte në zotërim. Ai ka kundërshtuar duke thënë se “është baba i dy fëmijëve dhe se nuk mund t’i japë para”, teksa pas vdekjes, në xhepa i janë gjetur pak më shumë se 100 mijë lekë të vjetra. Dëshmitarët që ndodheshin në vendin e ngjarjes, çuditërisht kanë parë se viktima u godit me grusht dhe më pas ra në tokë e përplasi kokën në trotuar, por... nuk kanë parë dhe nuk kanë identifikuar dot se kush ishte autori. E nga ana tjetër, dëshmia e autorit të dyshuar, Denis Meçe, është e pazakontë! Ai thotë mes të tjerash se nuk e njihte, edhe pse dëshmitarë në lokalin ku ishin të dy para ngjarjes thonë se “e thërrisnin njëri-tjetrin kushëri, kushëri”, teksa më tej tregon se pasi i kishte kërkuar një cigare dhe viktima ia kishte dhënë, sipas Meçes ai e kishte sharë më tej. Meçe thotë se pasi e ka sharë, ka dashur vetëm që “t’i fusë një shpullë”, por sapo i është afruar dhe ka ngritur dorën, Proga është shembur në tokë. Pas ngjarjes familjarët hodhën akuza ndaj policisë, duke thënë se është tentuar që të fshihet ngjarja dhe rrjedha e saj, për të mbrojtur autorin, duke tentuar të raportohet si një vdekja aksidentale. Nga ana tjetër në një konferencë për shtyp kreu i Policisë së Shtetit, Muhamet Rrubullaku tha se policia nuk ka tentuar në asnjë moment që ngjarjen ta fshehë, dhe se nuk bëhet fjalë për një sherr “të fortësh”, por se për fat të keq viktima ka ndërruar jetë pasi u godit në një sherr çasti e sipër. Nga ana tjetër e habitshme është sesi Prokuroria e Korçës zbuti akuzën ndaj Meçe, teksa policia e referoi ngjarjen “si vrasje me dashje”, ndërsa Prokuroria e cilësoi “si vrasje nga pakujdesia”. Por çfarë thonë dëshmitarët në vendin e ngjarjes, dhe përse deklarata e tyre ose janë kontradiktore, ose... në një mënyrë të pashpjegueshme dikush nuk ka parë ngjarjen me detaje sepse s’ka qenë i interesuar, dikush ka parë të dhunohet Proga, por si për çudi nuk ka parë autorin, dikush tjetër i ka dëgjuar të bisedonin e më pas të ofendoheshin, por një tjetër thotë se nuk ka dëgjuar asgjë...