Një emigrant shqiptar u vra në Itali me armë zjarri. Viktima është Klaudjo Myrtaj,3 4-vjeç. Sipas mediave italiane ai u gjet të shtunën në afërsi të zonës së Vernantes në Cuneo me plagë plumbi në kokë. I riu u dërgua me urgjencë drejt spitalit por pavarësisht ndihmës mjekësore nuk mundi të mbijetojë. Lajmi u bë I ditur këtë të diele nga mediat, të cilat thanë se 34-vjeçari ndodhej në Itali prej dy vitesh dhe punonte në një kantier që merrej me ndërtimin e rrugëve. Ai herë pas here bashkëpunonte dhe me një zejtar vendas. Ditën e ngjarjes 34-vjeçari ndodhej në punishte së bashku me pronarin e tij. Por në momentin që ky I fundit u largua me traktor për të blerë benzinë, një person ende I paidentifikuar hyri brenda punishtes dhe e qëlloi me armë shqiptarin Klaudjo Myrtaj. Vrasësi dyshohet se përdori një pistoletë me silenciator pasi në zonë nuk u dëgjuan të shtëna. Sipas gazetës la Stampa, ishte vetë pronari ai që njoftoi policinë për ngjarjen pasi kur u kthye e gjeti të riun shqiptar të gjakosur. Nga hetimet paraprake, hetuesit dyshojnë se krimi mund të ketë ndodhur për motive xhelozie. Deri më tani janë marrë dëshmitë e të gjithë personave me të cilët bashkëpunonte shqiptari si dhe të dashurës së tij. Ndërsa janë sekuestruar nga policia edhe kamerat e sigurisë me qëllim identifikimin dhe kapjen e autorit.