Personalitete nga e gjithë Mbretëria e Bashkuar i kanë shprehur ngushëllimet një komentatori sportiv të BBC-së, pasi humbi bashkëshorten dhe dy vajzat e tij. Carol Hunt, 61 vjeç, gruaja e komentatorit të garave me kuaj të BBC, John Hunt, dhe vajzat e tyre, Hannah Hunt, 28 vjeçe, dhe Louise Hunt, 25 vjeçe, vdiqën nga plagët e marra në një sulm me hark në Bushey, në veriperëndim të Londrës të martën. 26-vjeçari Kyle Clifford i dyshuar për vrasjet, u gjet nga policia britanike në Enfield, në veri të Londrës, një ditë pas ngjarjes në gjendje të rëndë shëndetësore. “John Hunt është kolegu ynë dhe miku ynë, jo vetëm për ekipin aktual 5 Live Sport, por për të gjithë ata që kanë punuar këtu me të gjatë 20 viteve të fundit. Në emër të të gjithëve, mendimet dhe mbështetja jonë janë me John dhe familjen e tij”, u shpreh prezantuesi i BBC Sport Mark Chapman. “John Hunt është një nga më të mirët, jeta e tij u shkatërrua”, tha Dan Walker, i cili dikur drejtonte emisionin e BBC Football Focus. “Ndërsa vendi feston, kurseni një mendim për John Hunt. Nuk më kujtohet të jem kaq i tmerruar në vite. Ato vajza të gjora. Vërtet e tmerrshme”, shkroi në një reagim ish-futbollisti Michael Owen. Ngushëllimeve iu bashkua edhe Autoriteti Britanik i Kuajve. Ekzekutimi i tre grave tronditën Britaninë, ku vrasjet masive janë të rralla, por dhuna ndaj grave dhe vajzave është etiketuar zyrtarisht si një kërcënim kombëtar. Një grua vritet nga një burrë çdo tre ditë në Mbretërinë e Bashkuar dhe një në katër gra do të përjetojë dhunë në familje gjatë jetës së tyre, sipas raporteve. Organizatat bamirëse dhe të të drejtave të njeriut kanë përsëritur kërkesat për të trajtuar femicidin në Britani. Pamjet: AFP