Vrasja brutale e gjyqtarit të Gjykatës së Apelit, Astrit Kalaja, në sallën e gjyqit në krye të detyrës, tronditi opinionin publik, por edhe sistemin gjyqësor në Shqipëri. Pas ngjarjes, institucionet më të larta të drejtësisë reaguan me deklarata solidariteti dhe me një apel për reflektim kombëtar. Gjykata e Apelit, ku gjykatësi Kalaja shërbente, e cilësoi ngjarjen si një “goditje për të gjithë shoqërinë tonë”, duke bërë thirrje për rritje të menjëhershme të masave të sigurisë në ambientet gjyqësore dhe ndalim të gjuhës së urrejtjes ndaj gjyqtarëve. “Siguria është parakusht i pandashëm për ushtrimin e pavarur të detyrës gjyqësore,” thuhet në reagim. Gjykata e Posaçme kundër Korrupsionit dhe Krimit të Organizuar e përshkroi aktin si “kërcënim serioz për pavarësinë e gjyqësorit dhe besimin e qytetarëve në shtetin e së drejtës.” Në deklaratë thuhet se magjistratët nuk duhet të ndihen të pambrojtur në detyrë, duke theksuar nevojën për masa konkrete. Edhe Gjykata Kushtetuese shprehu tronditjen për ngjarjen, duke theksuar se “ky nuk është thjesht një sulm ndaj një individi, por një sulm ndaj vetë shtetit të së drejtës.” Institucioni bëri thirrje për veprim të menjëhershëm dhe të vendosur për të garantuar sigurinë fizike dhe institucionale të gjyqtarëve dhe qytetarëve. Këshilli i Lartë Gjyqësor e cilësoi vrasjen si një akt kriminal që “cenon themelet e shtetit të së drejtës”, duke theksuar se “çdo akt që cenon integritetin e gjykatave, dëmton gjithçka që ndërtohet me punë dhe përkushtim”. Ndërsa Këshilli i Lartë i Prokurorisë u shpreh se “vrasja e një magjistrati në sallën e gjyqit është një akt i paimagjinueshëm dhe një sulm i drejtpërdrejtë ndaj Kushtetutës dhe sigurisë publike”. KLP bëri thirrje për unitet institucional dhe një përgjegjësi të përbashkët shtetërore për mbrojtjen e përfaqësuesve të drejtësisë.