Dy persona të prezantuar si shtetas të huaj kanë vjedhur një shumë të konsiderueshme eurosh në një pikë shërbimesh në Shkodër, e cila ndër të tjera ofron edhe këmbim parash. Shtetasit që janë prezantuar si ukrainas, kanë kërkuar këmbimin e një shume të konsiderueshme, që sipas burimeve të “Top Channel” bëhet fjalë për më shumë se 70 mijë euro. Pasi kanë kërkuar eurot, personi që administron këtë pikë shërbimesh i ka bërë gati monedhat të ndara në dy zarfe duke qëndruar në pritje që dy të huajt t’i jepnin lekët. Përpara se të largoheshin dy shtetasit nëpërmjet disa manovrave për të zhvendosur vëmendjen e pronarit, kanë ndërruar zarfet duke marrë ato me euro dhe duke lënë dy zarfe të mbushura, por pa para brenda. Menjëherë është bërë denoncimi në policinë e Shkodrës ndërsa janë këqyrur edhe kamerat e sigurisë në rrugët e qytetit për të bërë të mundur gjetjen dhe identifikimin e dy personave që vodhën eurot. Është kërkuar gjithashtu edhe ndihma e qytetarëve për t’i denoncuar në rast se dikush i pikas. Në pamje duken fytyrat e dy personave që dyshohet se kanë vjedhur sasinë e konsiderueshme të eurove, ndërsa policia po heton për zbardhjen e ngjarjes.