Venezuela pritet të ‘zhytet’ në thellë në diktaturë, pasi Nicolas Maduro do të zgjasë sundimin e tij 12-vjeçar, pavarësisht dyshimeve se vodhi zgjedhjet presidenciale të vitit të kaluar. “The Guardian” shkruan se zgjedhjet u fituan nga Edmundo Gonzalez, i cili u largua për t’i shpëtuar ndonjë atentati të mundshëm. Megjithatë ai është zotuar se do të rikthehet në Venezuelë për të sfiduar inaugurimin e planifikuar të Maduros të premten. Ministri i brendshëm venezuelas paralajmëroi Gonzalesin se do të arrestohet në rast se kthehet në Venezuelë. “Eja, të presim”, provokon ministri Cabello. Vëzhguesit thonë se inaugurimi i pritshëm i Maduros, të cilin liderët e shumicës së qeverive demokratike do ta bojkotojnë, përfaqëson një moment historik në rënien e ngadaltë të një prej demokracive më të mëdha të Amerikës së Jugut. “Administrata e Maduro u shndërrua nga një autoritarizëm elektoral në të qenit një regjim autoritar i mbyllur. Ai është një diktator brutal që burgos njerëzit që mendojnë ndryshe dhe që e kundërshtojnë atë. Është një diktator që mbikëqyri kolapsin më të madh ekonomik në historinë moderne të Amerikës Latine dhe është përgjegjës për eksodin më të madh të emigrantëve në historinë e hemisferës”, shprehet akademisti John Polga-Hecimovich. Në prag të ceremonisë të së premtes në Karakas, aktivistët akuzuan agjentët e Maduros për rrëmbimin e më shumë se një duzinë figurave të lidhura me opozitën, duke përfshirë dhëndrin e González, Rafael Tudares, aktivistin e të drejtave të njeriut Carlos Correa dhe një politikan të njohur opozitar të quajtur Enrique Márquez.