Izraeli njoftoi sot përfundimin e barrierës kufitare me qytetin palestinez të Gaza, të pajisur me sensorë, radarë e kamera, edhe pse nuk pranon të shpallë kufijtë me Palestinën. Izraeli mban nën bllokadë qytetin e Gaza prej ardhjes në pushtet atje të grupit militant Hamas në vitit 2007, duke kufizuar qarkullimin e njerëzve e mallrave. Në Gaza jetojnë rreth 2 milionë palestinezë. Ministria izraelite e mbrojtjes tha se gardhi 65-kilometra i gjatë u përfundua pas tre vjet ndërtimi dhe përfshin dhe barriera nëntokësore me kamera e sisteme monitorimi. “Struktura vendos një barrierë të hekurt mes grupit terrorist Hamas dhe rezidentëve në jug të Izraelit”, tha minsitri izraelit i mbrojtjes Benny Gantz. Gjatë konfliktit të fundit mes Izraelit dhe Hamas në maj, militanët palestinezë lëshuan qindra raketa drejt Izraelit, i cili u kundërpërgjigj me qindra bombardime ajrore. Të paktën 240 njerëz u vranë nga sulmet mbi Gaza, ndërsa 12 raportohet se u vranë në Izrael gjatë 11 ditëve të konfliktit. Izraeli thotë se bllokada ndaj Gaza është e nevojshme për t’u mbrojtur nga kërcënimet prej Hamas, por kritikët thonë se ajo ka shkaktuar krizë humanitare në territor. Izraeli ka ndërtuar disa barriera kufitare në territoret që e lidhin atë me Bregun Perëndimor në Palestinë, territor që e ka pushtuar që prej Luftës 6-Ditore në 1967.