Duke cituar arsyet e sigurisë për ushtarët e vendit të tij, ambasadori i Steteve të Bashkuara në Prishtinë, Jeffrey Hovenier e tregoi edhe në një herë në intervistë për REL se Washingtoni e sheh me skepticizëm të madh këtë lëvizje të Prishtinës zyrtare në këtë moment. Kreu i misionit diplomatic amerikan foli për një rrezik real që buron nga një hap i tillë tani. “Ne besojmë se ky rrezik rrit kërcënimin, mundësinë e dhunës dhe problemet e tjera, si për komunitetin lokal, ashtu edhe për ushtarët e NATO-s, përfshirë ushtarët amerikanë që po punojnë për të siguruar paqen dhe sigurinë në Kosovë. Ne e marrim shumë seriozisht çdo veprim që mund të ndikojë në sigurinë dhe mbrojtjen e ushtarëve amerikanë që punojnë për të mbështetur Kosovën”, tha Hovenier. “Shpresa jonë është që Qeveria e Kosovës do ta dëgjojë këtë dhe do t'i marrë parasysh këto shqetësime”, shtoi ai. Ekzekutivi Kosovar e ka bërë të qartë tashmë se synon të hapë për qarkullimin e automjeteve urën mbi lumin Ibër, që ndan Mitrovicën e Jugut me shumicë shqiptare dhe atë të Veriut me shumicë serbe. Me gjithë kundërshtimin e vendeve të QUINT-it dhe NATO-s, kryeministri Albin Kurti, vazhdon të argumentoje ka thënë se ura duhet të hapet dhe se “nuk është kundër askujt”. Paralajmërimi për hapjen e urës u bë pasi autoritetet e Kosovës më 5 gusht mbyllën zyrat e Postës së Serbisë në veri, veprim ky që gjithashtu u konsiderua nga aleatët e Kosovës si “i pakoordinuar dhe i njëanshëm”. Hovenier u shpreh hapur se SHBA-ja është sfiduar nga Kurti dhe qeveria e tij në disa aspekte, dhe theksoi se veprimet e pakoordinuara në veri e zvogëlojnë entuziazmin e SHBA-së për të mbështetur Kosovën në rrugën e saj euroatlantike.