Turistët afganë janë rikthyer në liqenin mahnitës Band-e-Amir, duke u hedhur në ujërat e kristalta të kenionit, e duke lundruar me pedalo. “Është i përkryer për një piknik, të gjithë duhet të vijnë, është një vend plot gëzim,” tha një prej vizitorëve. Gjashtë liqenet joshëse në kenionet e maleve Hindu Kush, sipas legjendës janë një mrekulli e krijuar nga Aliu, kushëri i profetit musliman Muhamed. Ngjyra e tyre e veçantë vjen prej përmbajtjes minerale të ujit dhe të shkëmbinjve gëlqerorë që i rrethojnë. Pas ardhjes në pushtet të talibanëve, atraksioni në provincën Bamian ishte zbrazur, por disa javë më vonë turistët po rikthehen. Barkat e shëtitjes kushtojnë rreth shtatë dollarë ora.