Një tjetër deklaratë e bujshme polemizuese dhe një tjetër tërheqje nga ana e presidentit amerikan Donald Trump ka ngjallur reagimin e ministrisë së jashtme të Egjiptit, e cila pohoi se i vlerëson deklaratat e bëra nga presidenti amerikan, Donald Trump, për të mos kërkuar që banorët e Rripit të Gazës të largohen nga enklava. Trump u shpreh më herët se “askush nuk po dëbon ndonjë palestinez nga Gaza”, teksa u përgjigj në një pyetje për këtë çështje gjatë një takimi në Shtëpinë e Bardhë me kryeministrin irlandez, Micheal Martin. “Ky qëndrim reflekton qartë të kuptuarit e nevojës për të parandaluar përkeqësimin e mëtejmë të situatës humanitare në Gazë dhe rëndësinë e gjetjes së një zgjidhjeje të drejtë, të qëndrueshme për çështjen palestineze”, thuhet në deklaratën e ministrisë. Trump kishte propozuar që SHBA-ja të merrte në pronësi enklavën e shkatërruar në pjesë të madhe nga lufta mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Europian. Presidenti amerikan kishte deklaruar më herët se zhvendosja e palestinezëve do të bëhej me qëllim që territori bregdetar të zhvillohej ekonomikisht dhe të kthehej në një vend “fenomenal” ku kombësi të ndryshme mund të jetojnë në paqe. Më herët këtë muaj, liderët arabë i dhanë dritën jeshile një plani egjiptian në vlerën e 53 miliardë dollarëve për rindërtimin e Gazës, plan ky që do të shmangte zhvendosjen e palestinezëve nga enklava, ashtu siç ka propozuar presidenti amerikan.