Udhëheqësit evropianë paralajmëruan se "paqja me Rusinë" nuk mund të vendoset pa Ukrainën, në një kohë që presidenti amerikan Donald Trump përgatitet të takohet me Vladimir Putinin në Alaskë javën e ardhshme.Sky Neës thotë se nisur edhe nga ky fakt, Shtëpia e Bardhë po “shqyrton” ftesën e presidentit ukrainas në takimin e Alaskës. Burimet thanë se një vizitë nga zoti Zelenskyy nuk është finalizuar dhe është e paqartë nëse udhëheqësi ukrainas do të jetë në Alaska. Megjithatë, zyrtari i lartë i administratës amerikanë tha se prezenca e tij është "absolutisht" e mundur. Sekretari i Jashtëm i Mbretërisë së Bashkuar, David Lammy, priti të shtunën një takim të zyrtarëve të lartë ukrainas dhe këshilltarëve evropianë të sigurisë kombëtare në rezidencën e tij zyrtare në Kent, ku po qëndron me pushime edhe zëvendëspresidenti i SHBA-së, JD Vance. Në një deklaratë të përbashkët të lëshuar pas takimit, udhëheqësit e Britanisë, Francës, Gjermanisë, Polonisë, Finlandës dhe Komisionit të BE-së paralajmëruan se "qasja e vetme" për t'i dhënë fund luftës "kombinon diplomacinë aktive, mbështetjen për Ukrainën dhe presionin ndaj Federatës Ruse". Deklarata vjen mes shqetësimeve të raportuara nga Ukraina dhe aleatët e saj në NATO se zoti Trump mund të bjerë dakord me propozimet e Putinit për t'i dhënë fund luftës, pa marrë parasysh qëndrimet e Ukrainës. Të premten përpara se Uashingtoni dhe Moska të konfirmonin se udhëheqësit e tyre do të takoheshin, zoti Trump u kishte thënë gazetarëve në Shtëpinë e Bardhë se "Po i afrohemi shumë një marrëveshjeje për t'i dhënë fund konfliktit. Ai foli për “një shkëmbim territoresh në dobi të të dyja palëve”.