Një krim i rëndë në një familjeje shqiptare ndodhi këtë të shtune në Itali. 45-vjeçarja shqiptare, Gentiana Hudhra nënë e dy fëmijëve, u masakrua me thikë nga ish-bashkëshorti i saj. Ngjarja kriminale ndodhi në Provincën e Maceratës, në vendin fqinj, ku shqiptarja u qëllua disa herë me një thikë kuzhine nga 55-vjeçari shqiptar, në një nga zonat më të populluara të qytetit. Pas ngjarjes, autori nuk tentoi të arratisej, por u arrestua nga karabinierët teksa rrinte i ulur në një stol. Gruaja jetonte prej disa vitesh në Tolentino dhe ishte nënë e dy fëmijëve të rritur, 21 dhe 23 vjeç, që i kishte nga martesa me autorin. Çifti ishte ndarë prej tre vitesh dhe deri më tani nuk janë raportuar episode të mëparshme dhune apo kërcënimesh. Autoritetet po marrin në pyetje anëtarë të familjes dhe persona të njohur për të kuptuar më mirë marrëdhënien mes çiftit dhe nëse kishte shenja paralajmëruese që janë neglizhuar. Sipas burimeve paraprake, 55-vjeçari dyshohet se ka pasur çrregullime psiqike. Ngjarja ka tronditur komunitetin vendas dhe ka nxitur reagime të forta në mediat italiane, si edhe në komunitetin shqiptar në rajon, duke rihapur debatin mbi dhunën ndaj grave dhe nevojën për masa parandaluese më efikase.