Tregu i punës në fushën e teknologjisë duket se është maturuar në Shqipëri, teksa numëron rreth 23 mijë profesionistë në rang vendi, nga të cilët 90% e tyre punojnë në privat dhe baza e më shumë se 80% e punonjësve është Tirana. Një studim i Fondacionit Shqiptaro Amerikan për Zhvillim mbi zhvillimin e këtij sektori dhe sfidat aktuale, nxjerr në pah se gati 50% e kompanive që operojnë në territorin shqiptar eksportojnë shërbimet e tyre jashtë. “Një sektor që ka rritje por mund ta quajmë të pjekur tanimë, me një rritje më modeste me 5% në vit. Tregu ka kërkesa, ka një rritje të vazhdueshme të pagave. Kompanitë pretendojnë që vështirësia më e madhe është presioni nga stafi për rritje të shpeshta pagash. Megjithëse më shumë se gjysma e tyre tregojnë se i kanë rritur pagat në 12 muajt e fundit. Duket se nuk është aq e vështirë për kompanitë që të punësojnë profesionistë sepse koha mesatare për të plotësuar një vend bosh është 3.1 muaj”. Ndonëse teknologjia mbetet preferenca kryesore në aplikimet e të rinjve për studimet universitare, studimi i AADF zbulon se mbi 36% e sipërmarrjeve në fushën e ICT raportojnë vështirësi në punësimin e talenteve, sidomos në fushën e sigurisë kibernetike dhe inteligjencës artificiale. “Po kërkojnë më tepër punonjës të nivelit të mesëm dhe të lartë, pra jo punonjës që sapo dalin nga bankat e shkollës. Ju duhet një profil kandidati me një eksperiencë rreth 5 vjecare, dikush që ka njohuri shtesë në krahasim me cfarë ka marr nga institucionet arsimore. Konkluzioni është që duhet ti aftësojnë edhe vetë që ti përshtasin me nevojat e biznesit të tyre”. Tendencat e tregut në sektorin e teknologjisë përqëndrohen te inovacioni dhe siguria digjitale. Me rëndësi shihet edhe fakti se miti se ky profesion ju përket meshkujve po rrëzohet. “Kërkesa kryesore e kompanive në sektorin e teknologjisë është kryesisht për zhvillues programesh, siguri kibernetike apo inteligjencë artificiale. Zhvillues programesh përbëjnë rreth 44% të punësuarve në këtë sektor dhe gati 60% e tyre janë femra”.