Një shpërthim i fuqishëm ndodhi pasditen e së premtes në fshatin Varagë të Zubin Potokut dhe është dëmtuar kanali i ujit të Ibër-Lepencit. Ky ishte incidenti i tretë gjatë dy ditëve të fundit. Lajmi u konfirmua nga autoritetet e policisë për rajonin e veriut. Mësohet se uji ka nisur të rrjedhë nga kanali në mënyrë të pakontrolluar dhe një pjesë e banorëve kanë mbetur pa furnizim. Gjatë dy 48 orëve të fundit në Veri pati disa incidente të tjera. Në Zveçan u gjuajtën bomba në stacionin policor dhe në oborrin e komunës. Për këtë, Policia të premten njoftoi se ka rritur masat e sigurisë në të gjithë vendin. Ndërtesa e Komunës së Zveçanit u sulmua me një mjet shpërthyes, që besohet të jetë granatë dore, e pohuar kjo nga zëvendësdrejtori i Policisë së Kosovës për veriun, Veton Elshani. Shpërthimi ndodhi pak para mesnatës të së enjtes. Granata besohet të ketë qenë e llojit M-75. Ky ishte sulmi i dytë brenda ndaj institucioneve në këtë komunë me shumicë serbe, pas sulmit po me granata dore ndaj një stacioni policor. Nga shpërthimi, veç ndërtesës së komunës, dëme kanë pësuar edhe katër automjete të parkuara aty pranë, por fatmirësisht nuk ka asnjë të lënduar. Komuna e Zveçanit drejtohet nga një kryetar shqiptar që prej vitit të kaluar pasi serbët dhanë dorëheqje nga institucionet e Kosovës dhe i bojkotuan zgjedhjet komunale në prill të atij viti. Kryetari i komunës së Zvecanit, Ilir Peci e dënoi ashpër këtë akt të papranueshëm dhune. Vitet e fundit janë regjistruar disa episode të ngjashme në veri të Kosovës.