Të mërkurën në mbrëmje, kur një nga vagonët e tramvajit të famshëm “Gloria” të Lisbonës doli nga kthesa e një rruge të pjerrët me kalldrëm, u përplas në një ndërtesë. “Ai goditi një ndërtesë me forcë brutale dhe u shpërbë si një kuti letre”, ka thënë një dëshmitare, duke shtuar se dukej sikur "nuk kishte frena". Policia ende po heton shkakun e aksidentit, i cili la të vdekur të paktën 17 persona dhe të lënduar 20 të tjerë, disa në gjendje kritike në kryeqytetin portugez. "Ishte e tmerrshme... zhurma ishte ndryshe nga çdo gjë që kisha dëgjuar ndonjëherë. Jam e tronditur”, thotë një tjetër kalimtare. Tramvaji “Glória” është një hekurudhë që filloi të funksionojë në vitin 1885 dhe tani klasifikohet si monument kombëtar. Çdo udhëtim përbëhet nga dy vagonë të lidhur mekanikisht nga një sistem kabllosh: kur njëri zbret, tjetri ngjitet. Hetimet fillestare sugjerojnë se dalja nga shinat u shkaktua nga një kabllo sigurie që u prish, gjë që çoi në humbjen e kontrollit gjatë zbritjes. Pa frenat e saj ndihmëse, kabina përshpejtoi derisa u përplas. Sipas shtypit portugez, kontrata e mirëmbajtjes dhe sigurisë vagonët e tramvajit “Glória”, skadoi në fund të gushtit. Tenderi i ri për menaxhimin e inspektimeve teknike u anulua më 14 gusht sepse të gjitha ofertat e marra tejkaluan koston maksimale të lejuar. Kjo la një boshllëk kontraktual në ditët para aksidentit, duke shkaktuar polemika të forta mbi menaxhimin administrativ dhe parandalimin e rrezikut. Mungesa e një operatori të emëruar zyrtarisht bëri që disa figura të opozitës të kërkonin ngritjen e një komisioni hetimor parlamentar.