Një ngjarje tragjike ka tronditur në Montreal, ku një grua 34-vjeçare dhe djali i saj trevjeçar nga Kosova humbën jetën pas mbytjes në një pishinë rezidenciale mbrëmjen e së martës. Viktimat janë Elzina Ramosaj Morina dhe djali i saj i mitur, Elon, nga komuna e Deçanit. Oficerët e policisë u thirrën në vendngjarje pasi morën thirrjen se dy persona mund të jenë mbytur në një shtëpi. Me të mbërritur, ata i gjetën të dy viktimat pa ndjenja. Pavarësisht përpjekjeve nga policia dhe ndihmësit mjekësorë, gruaja dhe fëmija u shpallën të vdekur në vendngjarje. Sipas provave hetimore të mbledhura nga Policia e Montrealit, duket se nuk ka element kriminal në këtë tragjedi, duke e cilësuar si një incident aksidental. Hetimi nga ana tjetër i ka kaluar zyrës së mjekut ligjor. Sipas burimeve për mediat kanadeze, dyshohet se djali ka rënë fillimisht në pishinë, ndërsa nëna është hedhur për ta shpëtuar, por ajo nuk dinte not. Sipas dëshmitarëve, nëna dhe djali i vogël ishin parë së fundmi duke marrë pjesë në një paradë festive. Për këtë ngjarje tragjike ka reaguar dhe Shoqata Shqiptare Kosova-Montreal, duke i shprehur ngushëllimet familjarëve dhe të njohurve të viktimave dhe gjithashtu duke bërë me dije detajet e ceremonisë mortore.