Prokuroria e Posaçme Antikorrupsion mbyll hetimet dhe dërgon në gjyq 27 të pandehur, anëtarë të dy grupeve të strukturuara kriminale. Nga hetimet e SPAK ka rezultuar se dy grupet kriminale, të përbërë nga shtetas shqiptarë dhe të huaj, kanë organizuar kalimin e paligjshëm të kufirit shqiptar të më shumë se 650 shtetasve të huaj, kryesisht nga Bangladeshi dhe Kameruni, përmes territorit shqiptar, me destinacion final vendet e Bashkimit Europian. Hetimet kanë zbuluar se Shqipëria përdorej si vend tranzit, territor përmes të cilit lehtësohej hyrja e ligjshme e shtetasve të huaj nga kontinentet e Azisë dhe Afrikës në kontinentin e Evropës përmes transportit ajror, për të vijuar në mënyrë të paligjshme përmes transportit tokësor, drejt rrugës ballkanike. Kjo veprimtari bëhej duke shfrytëzuar aktet ligjore dhe nënligjore që rregullojnë punësimin e shtetasve të huaj. Sipas SPAK, dy grupet kriminale rekrutonin kryesisht meshkuj të moshave 24-35 vjeç, të cilët paguanin nga 6 mijë deri në 8 mijë euro, pagesa që kryheshin kryesisht në Dubai dhe më pas transferoheshin në Shqipëri, te drejtuesit e bandave. Nga kontrollet e ushtruara në banesat e të pandehurve janë sekuestruar shuma të mëdha parash në dollarë, euro, paund dhe lekë.