Sekretari i Partisë së Lirisë, Tedi Blushi ka publikuar foton e njërit prej kandidatëve për shef komisariati. Blushi shprehet se Vilson Bala është personin që ka arrestuar ish-presidentin Ilir Meta pak javë më parë në Tiranë, i cili aktualisht ndodhet në burgun “313”. Në reagimin e tij sekretari i PL-së pretendon se për veprimin e tij, qeveria do ta shpërblejë atë me detyrën e lartë të Drejtorit të Policisë së Tiranës, prandaj është renditur i pari. “Ky është Vilson Bala. Nga Shtoi i Shkodrës. Më 21 tetor 2024 drejtoi në shkelje flagrante të ligjit, Kushtetutës dhe Konventës Europiane të të Drejtave të Njeriut, operacionin kriminal të rrëmbimit banditesk të Presidentit të Partisë së Lirisë, Ilir Meta. Për këtë shërbim ordiner politik (për të cilin nuk do të mbetet pa ndëshkimin më të ashpër) Edi Rama pritet ta shpërblejë Vilson Balën me detyrën e lartë të Drejtorit të Policisë së Tiranës! Madje e ka renditur të parin në listë! Vilson Bala do të kallzohet penalisht. Siç u kishim premtuar shqiptarëve, zbardhja me emra dhe fytyrë e të gjithë bandës së terroristëve të maskuar vijon!”, shkruan Blushi.