Damasku është goditur nga sulmet izraelite, të cilat deri më tani i kanë marrë jetën 15 personave. Izraeli i kreu dy sulme ajrore në një lagje në perëndim të Damaskut dhe në periferi të kryeqytetit, teksa 16 të tjera kanë mbetur të plagosur. Agjencia e lajmeve shtetërore raportoi se sulmet ajrore në lagjen Mazzeh në Damask dhe në periferi në veriperëndim të kryeqytetit, goditën dy ndërtesa. Associated Press raportoi nga vendi i ngjarjes se një ndërtesë pesëkatëshe u dëmtua pasi u godit nga një raketë. Ushtria izraelite tha se ka goditur qendrat komanduese dhe shënjestrat infrastrukturore të grupit militant, Xhihadi Islamik, në Siri, dhe se ka shkaktuar “dëme të mëdha ndaj qendrës komanduese të organizatës terroriste dhe operativëve të saj”. Ushtria izraelite deklaroi se Xhihadi Islamik kishte marrë pjesë, përkrah Hamasit, grupit militant palestinez në Rripin e Gazës, në sulmet e 7 tetorit 2023 në jug të Izraelit, që nxitën luftën e tanishme në Lindjen e Mesme.