Një lagje e tërë në pjesën malore të Libohovës po përballet me një situatë shqetësuese. Dhjetëra familje në lagjen “Hoxhallarë” denoncojnë praninë e një stalle me rreth 50 lopë, e vendosur pranë banesave. Banorët thonë se mbetjet organike të kafshëve derdhen në terren dhe, sipas tyre, arrijnë deri te burimi i ujit të lagjes. Për këtë arsye, ata janë detyruar të sigurojnë ujë rreth 10 kilometra larg banesave të tyre. Situata ka sjellë gjithashtu shtim të insekteve dhe erë të rëndë, ndërsa banorët thonë se po mendojnë edhe largimin nga lagjja. Për shqetësimin kërkuam një reagim nga Bashkia Libohovë. Kryetari Lenord Hide tha se bashkia i ka dërguar pronarit një shkresë zyrtare për zhvendosjen e stallës dhe i ka lënë një afat për marrjen e masave. Në të kundërt, sipas Hides, do të ndërmerren hapa ligjorë për zgjidhjen e situatës.