Gjendet i vdekur në Spanjë 30-vjeçari nga Shkodra, Miklovan Danaj, i cili ishte raportuar i zhdukur prej muajit maj të këtij viti. I riu shqiptar u gjet i pajetë në bregun e Marbellës, raportojnë mediat spanjolle, sipas të cilave, familjarët e tij kishin marrë një telegram, që konfirmonte vrasjen e tij. Sipas tyre, në mesazhin që i është dërguar familjes së 30-vjeçarit shqiptar shkruhej që ‘të mos e kërkojnë më Miklovanin pasi është vrarë dhe trupi është hedhur në bregun e Marbellas”. 30-vjeçari shqiptar Miklovan Danaj dyshohet se ishte përfshirë në trafikun e kokainës dhe klanet ndërkombëtare, ndërsa zhdukja e tij ishte raportuar në Spanjë dhe Shqipëri. “Guardia Civile ka nisur një hetim në Marbella. Nuk ka pasur arrestime dhe autoritetet nuk kanë zbuluar informacion mbi rrethanat aktuale të gjetjes”, njoftuan autoritetet spanjolle, të cilat po bashkëpunojnë me policinë shqiptare për të sqaruar situatën. Miklovan Danaj ishte zhdukur që prej muajit maj në rrethana të paqarta dhe prej asaj kohe nuk kishte asnjë shenjë nga ai.