Spanja mori sot presidencën e radhës së BE-së, të cilën do ta mbajë deri në dhjetor të këtij viti. Por ndonëse sinjale të ndryshme kanë mbërritur nga Madridi duke lënë të kuptohet se edhe mund ta ndryshonte qëndrimin në raport me pavarësinë e Kosovës, një ditë më parë, ambasadori i Spanjës në Beograd, Raul Bartolome Molina, u tregua i prerë për këtë cështje duke nënvizuar se vendi i tij nuk e njeh shtetësinë e Kosovës ndërsa mbështet përpjekjet e bllokut për normalizimin e marrëdhënieve mes saj dhe Serbisë. “Ky qëndrim nuk ka ndërruar, as nuk do të ndërrojë, dhe të gjithë aleatët tanë e dinë këtë shumë mirë”, deklaroi ai. Spanja është një nga pesë vendet e Bashkimit Europian që nuk njohin pavarësinë e Kosovës, bashkë me Sllovakinë, Rumaninë, Greqinë dhe Qipron. Sipas rendit të paracaktuar, Spanja mori presidencën e BE-së për gjashtë muaj pas Suedisë që e kishte pasur në gjashtëmujorin e parë të këtij viti. Presidenca suedeze i kishte nisur që në 9 janar konsultimet me vendet anëtare lidhur me kërkesën e Kosovës për anëtarësim në BE. Sipas procedurave në BE pasi një shtet aplikon për anëtarësim, Këshilli kërkon nga komisioni Evropian që të përpiloj mendimin se ai përmbush apo jo aplikuesi kushtet për status kandidati dhe për nisjen e negociatave të anëtarësimit. Kosova e dorëzoi kërkesën zyrtare për anëtarësim në 15 dhjetor. Është e paqartë tani sesi do të procedohet më tej lidhur me këtë kërkesë gjatë këtij 6 mujori, kur presidencën e bllokut e mban një vend që nuk e njeh pavarësinë e Kosovës.