Një sondazh i publikuar i opinionit publik në Shqipëri nga  Qendra e Institutit Ndërkombëtar Republikan (IRI) tregon se ka mbështetje të fortë për luftën kundër korrupsionit, dëshirë për qeverisje demokratike dhe shqetësime mbi ekonominë. Në Anketën Kombëtare tregohet një mbështetje e lartë e qytetarëve për SPAK-un, i cili vazhdon të mbetet institucioni më i besueshëm në vend.  Sondazhi i fundit zbuloi se 76% e shqiptarëve i besojnë Strukturës së Posaçme Kundër Korrupsionit dhe Krimit të Organizuar (SPAK), një subjekt i pavarur gjyqësor, misioni i të cilit është të luftojë korrupsionin. Pesëdhjetë e një për qind e shqiptarëve thonë se kanë më pak gjasa të mbështesin një kandidat apo parti në zgjedhje nëse kërkojnë të kufizojnë punën e SPAK.  Sondazhi zbuloi gjithashtu se 80% besojnë se demokracia është forma më e mirë e qeverisjes. “Me zgjedhjet parlamentare që vijnë më 11 maj është një shenjë pozitive që një shumicë dërrmuese e shqiptarëve duan të shohin vazhdimin e luftës kundër korrupsionit”, tha Paul McCarthy, Drejtor i Evropës për IRI. “Përpjekjet kundër korrupsionit do të rrisin transparencën dhe llogaridhënien midis zyrtarëve të zgjedhur dhe do të forcojnë besimin tashmë të fortë se demokracia është forma më e mirë e qeverisjes.” Gjithashtu, sondazhi zbuloi se ekonomia mbetet shqetësimi më i madh. Konkretisht, kostoja e lartë e jetesës është prioriteti kryesor për 80% të qytetarëve; prioriteti i dytë më i lartë është papunësia (45%).  ”Sondazhi ynë tregon qartë se votuesit do të kërkojnë kandidatë në pranverë të cilët mund të ofrojnë mënyra për të ulur kostot, për të krijuar mundësi të reja pune dhe për të rritur standardin e jetesës,” tha McCarthy.  Sondazhi u krye nga IDRA Research & Consulting në emër të Qendrës për Vështrime në Kërkimet e Anketave të  Institutit Republikan Ndërkombëtar  në të gjithë Shqipërinë. Puna në terren u krye midis 3 tetorit dhe 2 nëntorit 2024, përmes teknikës së Intervistimit Personal të Asistuar me Kompjuter (CAPI), e administruar përmes intervistave ballë për ballë në shtëpitë e të anketuarve. Kampioni prej 1200 shqiptarësh u përzgjodh nëpërmjet një përzgjedhjeje të grupimeve të shtresuara dhe kampioni i arritur u mor i balancuar për grupmoshat, rajonin, gjininë dhe arsimin sipas parametrave të Censusit 2023. Marzhi i gabimit për intervalin e mesëm të kampionit të plotë nuk i kalon ±2,8 pikë në nivelin 95% të besimit. Shkalla e përgjigjeve ishte 51%.