Gjyqi i shumëpritur për vdekjen e legjendës së futbollit Diego Maradona është anuluar zyrtarisht nga Gjykata e Tretë Penale, pas një skandali që ka tronditur sistemin gjyqësor argjentinas. Gjyqi, për vrasje me dashje të mundshme, ndaj shtatë anëtarëve të ekipit mjekësor që kishin për detyrë kujdesin e Maradonës pas operacionit të tij në tru, u pezullua fillimisht pasi një prej gjyqtareve, Julieta Makintach, u shfaq në mënyrë të papritur në një dokumentar televiziv për rastin. Në pamjet e mini-serialit, të quajtur tashmë nga mediat “Gjyqtarja e Zotit”, Makintach shihej duke përgatitur dokumente në një tavolinë gjyqi, ndërsa transmetoheshin pamje nga momentet kritike të vdekjes së Maradonës, përfshirë edhe një telefonatë emergjente që kërkonte një ambulancë. Këto pamje tronditëse, të dyshuara se janë filmuar brenda sallës së gjyqit pa leje, përbëjnë shkelje të rënda të procedurës gjyqësore dhe çuan në sekuestrimin e provave nga policia. Si pasojë, Makintach ka dhënë dorëheqjen dhe procesi është shpallur “i pavlefshëm”. Me largimin e saj, trupa gjykuese mbeti vetëm me dy anëtarë. Ishte një prej gjyqtarëve që njoftoi zyrtarisht anulimin e procesit, duke thënë: “Gjithçka po shkonte mirë, përveç një personi që doli jashtë vijave. Kjo çështje duhet të dëgjohet në një gjykatë tjetër.”