I kanë vënë shumë emra, “mbreti i skenës shqiptare” , “gjenerali i saj”, “gjeniu i regjizurës sonë”. Për Pirro Manin, asnjë prej tyre nuk ishte më shumë nga c`meritonte. Sot arti shqiptar është në zi për humbjen e këtij njeriu të madh. Mjeshtri i skenës u shua në moshën 89 vjecare. Pavarësisht se jetonte prej vitesh në Amerikë me të shoqen, aktoren e njohur e të shumëadhuruar nga publiku shqiptar, Pavlina Mani, ai mbeti një prej figurave më të nderuara, një respekt i fituar falë dhjetëra shfaqjeve të vëna në skenë e që mbajnë emrin e tij. Ideve te tij tejet të vlerësuara regjisoriale iu bashkengjiten edhe aftësitë e mëdha në aktrim, ndërsa Pirro Mani është përshkruar dhe si një pedagog i shkëlqyer. I lindur në Korcë 14 prillin e vitit 1932, ai punoi për 25 vjet pranë Teatrit Kombëtar, ndërsa studimet e larta i kishte kryer në Moskë. Fillesat i pati si regjisor i teatrit “Andon Zako Cajupi” në Korcë, por nuk vonoi shumë që falë talentit dhe zotësive të veta të padiskutueshme, të katapultohej në Teatrin Kombëtar ku realizoi me dhjetëra pjesë teatrale. Mes 80 shfaqjeve të vëna në skenë prej tij, spikatën sidomos "Arturo Ui", "Gjenerali i ushtrisë së vdekur", “Epoka para gjyqit”, "Nata e 12 –të”, "Cuca e maleve", apo "Gjenerali i ushtrisë së vdekur". Përgjatë karrierës së tij të gjatë, Pirro Mani u vlerësua me një numër të madh cmimesh, e është nderuar edhe me titullin e lartë “Artist i popullit”, si një kurorë mbi vendin e nderit që i takon në artin shqiptar.