Situata e pandemisë ka nisur të përkeqësohet në Europë, e sidomos në lindjen të kontinentit të vjetër. Letonia hyri në izolim njëmujor, pasi numri i rasteve të reja me koronavirus shënoi nivele rekord. brenda 24 orëve të fundit, 3.000 infektiem të reja u regjistruan në këtë vend. Qendra Europiane për Parandalimin dhe Kontrollin e Sëmundjeve tha se Letonia ka aktualisht ka shkallën më të lartë të infeksionit në Europë. Kjo e shtyu kryeministrin Krisjanis Karins të njoftojë se për katër javë, do të kalohet në një regjim më të rreptë ndërsa bëri gjithashtu thirrje për të shtuar ritmin e vaksinimeve. Vetëm pak më shumë se gjysma e popullsisë letoneze është imunizuar deri tani plotësisht kundër Sars Cov 2. Masat e reja të izolimit do të përfshijnë dhe rikthimin e ndalim qarkullimit gjatë natës. Në Bullgari, autoritetet spitalore raportuan se numri i pacientëve të shtruar me koronavirus është rritur me 30 për qind muajin e fundit. Në Rumani, ku shifra ditore e të infektuarve ka arritur në 19,000 këtë javë, një në tre të rritur është i vaksinuar. Në Ukrainë, autoritetet shëndetësore thanë se kanë regjistruar mbi 22,000 raste infektimesh brenda një dite, duke thyer rekordin e mëparshëm të vendosur në muajin prill. Mjaft vende në Europën Lindore janë duke bërë përpjekje për të rritur normat e vaksinimit, të cilat janë më të ulëtat në Bashkimin Europian. Rusia sakaq raportoi raste të izoluara me një mutacion të variantit Delta, që besohet të jetë edhe më ngjitës.