Presidenti i SHBA-së, Donald Trump, u takua të shtunën me emirin e katarit Sheikh Tamim bin Hamad Al-Thani dhe kryeministrin Sheikh Mohammed bin Abdulrahman bin Jassim Al-Thani. Për shtetet e bashkuara Katari konsiderohet një aleat kyç në ruajtjen e marrëveshjes së brishtë të paqes në Gaza. Takimi ndryshe nga sa jemi mësuar ndodhi në bordin e avionit presidencial, gjatë një ndalese që pati për furnizim me karburant në rrugën e nisur për turin aziatik. Udhëheqësit e Katarit hipën në bordin e Air Force One kur avioni presidencial u ul në bazën ajrore Al Udeid, e cila strehon selinë rajonale të ushtrisë amerikane dhe mijëra trupave amerikane. Trump tha se dyshja e zyrtarëve të lartë të Katarit kishin luajtur një rol vendimtar në procesin e paqes në Lindjen e Mesme. Sipas presidentit amerikan, “Emiri i Katarit është një nga sundimtarët e mëdhenj të botës, jo vetëm të Lindjes së Mesme. Ai është i dashur dhe i respektuar nga vendi i tij, nuk e di se çfarë është më e rëndësishme - të jesh i dashur apo i respektuar, të dyja? Ju keni një preferencë, sepse i keni të dyja. Ju jeni një nga të paktët. Dhe Kryeministri ka qenë miku im dhe një mik i botës, dhe ne kemi bërë shumë së bashku në të kaluarën, veçanërisht për paqen në Lindjen e Mesme. Ju shprehim falënderimet tona tani që kemi një Lindje të Mesme të sigurt”. Gjatë fjalës së tij falënderuese, Trump tha se takime të tilla në bordin e Air Force One janë të rralla dhe i rezervohen njerëzve shumë të nderuar sis janë Emiri dhe kryeministri i Katarit.