Sulm i armatosur në Athinë, plagosje dhe ndjekje si në filma në rrugët e qytetit Të shtëna me armë zjarri janë regjistruar pasditen e sotme në zonën e Patisias, në Athinë, duke shkaktuar panik dhe mobilizim të menjëhershëm të forcave të policisë. Ngjarja ndodhi rreth orës 18:30, kur një person hyri në një dyqan telefonash celularë në rrugën “Patision” dhe hapi zjarr ndaj pronarit të biznesit, një shtetas me origjinë pakistaneze. Sipas informacioneve paraprake, ai u qëllua një herë në këmbë. I plagosuri u transportua me urgjencë drejt spitalit, ku po merr trajtim mjekësor dhe ndodhet jashtë rrezikut për jetën. Menjëherë pas të shtënave, autori u largua nga vendi i ngjarjes me një automjet tip BMW ngjyrë gri, i cili dyshohet se e priste jashtë dyqanit. Në makinë ndodheshin edhe tre persona të tjerë, të gjithë me origjinë shqiptare, sipas burimeve policore dhe dëshmive të para. Policia greke organizoi menjëherë një ndjekje intensive të automjetit të dyshuar. Pas disa minutash, makina u lokalizua në rrugën “Tsounta”, në Bulevardin “Kifissou”, në drejtim të Lamias. Gjatë përpjekjes për t’i shpëtuar policisë, automjeti është përplasur me tre deri në katër mjete të tjera në rrugë, përpara se të ndalonte plotësisht.