Një akt trimërie mori vëmendjen e opinionit publik në Greqi, ku një emigrant shqiptar është shpallur hero i ditës pas shpëtimit të dy fëmijëve që po mbyteshin në lumin Arahthos, në zonën e Artës. Ngjarja ka ndodhur në orët e para të mëngjesit, kur katër fëmijë arritën pranë lumit në Neohori. Dy prej tyre vendosën të futeshin në ujë për t’u larë, por papritur u zhdukën nga pamja. Të alarmuar, shokët e tyre që ndodheshin në breg vrapuan të kërkonin ndihmë, duke hyrë në një lokal të afërt. Një nga të pranishmit, Levian Gega, shqiptar që jeton prej vitesh në Neohori, reagoi menjëherë. Ai hoqi rrobat dhe u hodh në ujë pa u menduar dy herë. Thellësia në atë zonë të lumit arrin deri në 6-8 metra, duke e bërë ndërhyrjen jashtëzakonisht të rrezikshme. Pavarësisht kësaj, Leviani arriti të nxjerrë një nga fëmijët dhe më pas, me vështirësi të mëdha, edhe të dytin. Në një intervistë për mediat lokale, Gega rrëfeu mes lotësh momentet dramatike të shpëtimit: “Erdhën dhe kërkuan ndihmë. Hoqa rrobat dhe u hodha në ujë. Nxora njërin, pastaj shkova të gjej tjetrin. U zhyta, por nuk e gjeta. Më pas u hodha nga varka, ishte shumë thellë, 5-6 metra. E pashë fëmijën shtrirë, e kapa, me zor e nxora jashtë… mezi merrja frymë. Unë jam i huaj, por bëra një të mirë, nuk ka rëndësi origjina”, ka thënë ai. Sipas burimeve spitalore, njëri nga fëmijët kishte edemë të theksuar në tru, ujë në mushkëri dhe një frakturë në qafë. Gjendja e tyre vijon të jetë serioze, por mjekët po bëjnë gjithçka për t’i stabilizuar.