Aleksander Lekhov thotë se tensionet nuk ndihen shumë anëve të tij, edhe pse këto javët e fundit ka parë më tepër uniforma ushtarake nëpër rrugë. 32 vjecari është në mesin e mijëra qytetarëve me prejardhje shqiptare që jetojnë në disa fshatra dhe qytete të Ukrainës. Duke folur shqipen me pak vështirësi, ai tha për Radio Europa se situata në terren është më pak dramatike nga sa shfaqet në shtypin e huaj. “Tani, për momentin, nuk ka shumë probleme dhe frikë nuk kemi. Nuk e di çfarë do të ndodhë nesër ose pasnesër, por për sot nuk kemi kaq probleme sa tregojnë mediat”, thotë ai. Maxim Kirchev, një tjtër shqiptar i Ukrainës jeton në Kiev. 39 vjecari pohon se edhe atje situata është në përgjithësi është e qetë, megjithatë njerëzit po përgatiten për të gjitha skenarët. “Ne mundohemi të rrimë të qetë. Njerëzit, në përgjithësi, mundohen të mos bëjnë panik. Në Ukrainë është një thënie: Rrini të qetë dhe pastrojeni armën tuaj”, shprehet Maxim. Në Ukrainë besohet se jetojnë rreth 5 mijë qytetarë me prejardhje shqiptare. Ata janë të vendosur kryesisht përreth zonës së Odesës. Paraardhësit e tyre shkuan atje rreth 200 vjet më parë, për t’iu larguar asokohe luftërave të Perandorisë Osmane në zonën e Ballkanit. Të larguarit nga Shqipëria, sipas Aleksandr Dermentli, kryetar i Shoqatës “Bashkimi i Shqiptarëve të Ukrainës, e kanë pasur origjinën kryesisht nga zona e Korcës.