400 milionë dollarë do t`i paguajnë TikTok dhe kompania mëmë ByteDance qeverisë amerikane për t’i dhënë fund një çështjeje gjyqësore lidhur me shkeljen e privatësisë së fëmijëve. Bëhet fjalë për një nga marrëveshjet më të mëdha të arritura në SHBA për mbrojtjen e të dhënave të të miturve. Padia, e ngritur në vitin 2024 nga Departamenti amerikan i Drejtësisë gjatë administratës Biden, e akuzonte TikTok-un se kishte mbledhur sasi të mëdha të të dhënave të miliona përdoruesve nën moshën 13 vjeç, pa marrë pëlqimin e prindërve. Sipas autoriteteve amerikane, platforma nuk verifikonte në mënyrë efektive moshën e përdoruesve dhe nuk siguronte lejen prindërore, në shkelje të ligjit federal për privatësinë e fëmijëve, COPPA. Sipas marrëveshjes, TikTok dhe ByteDance do të paguajnë menjëherë 300 milionë dollarë, ndërsa 100 milionë dollarët e tjerë do të paguhen pasi të tërhiqet një arrëveshje e mëparshme detyruese e vitit 2019 me autoritetet amerikane. Argumenti i Departamentit të Drejtësisë për lëvizjen e fundit është se TikTok i ka ndryshuar praktikat e privatësisë dhe kontrollet për përdoruesit e rinj. TikTok kishte mbi 170 milionë përdorues në SHBA në kohën e padisë, ndërsa autoritetet amerikane e akuzuan platformën se ishte e orientuar edhe drejt fëmijëve, pa marrë masat e nevojshme për mbrojtjen e tyre. Ujdia vjen në një kohë kur edhe Meta po përballet me një proces gjyqësor në SHBA për akuza të ngjashme lidhur me Instagram-in dhe Facebook-un.