Një ngjarje e rëndë është raportuar në zonën turistike të Syrit të Kaltër, ku një punonjës që merrej me dhënien me qira të biçikletave elektrike brenda parkut, është dhunuar pas një konflikti me një turist. Sipas policisë, shtetasi me iniciale A.L., 27 vjeç, është sulmuar fillimisht me grushte dhe më pas është goditur me një gur në kokë. Konflikti ka nisur për pagesën e dëmit të shkaktuar pas humbjes së kartës së një biçiklete elektrike. Si pasojë e sulmit, i riu ka pësuar fraktura në të dyja duart, si dhe dëmtime në kokë dhe në pjesë të tjera të trupit. Menjëherë pas ngjarjes, autori është larguar nga vendi i ngjarjes, por është arrestuar nga policia. në pranga ka rënë 43-vjeçari A. H., si dhe janë proceduar penalisht tre shtetas të tjerë të përshirë në konflikt, mes të cilëve edhe administratori i subjektit. Autori i ngjarjes, 43-vjeçari me banim në Kamëz akuzohet për veprat penale "Plagosja e rëndë me dashje" dhe "Prishja e qetësisë publike". Ndërsa shtetasit A. H., 45 vjeç, banues në Kamëz (vëllai i të arrestuarit), S. Ç., 20 vjeç, banues në Dërmish, Finiq, dhe administratori i subjektit, u proceduan në gjendje të lirë për veprat penale "Plagosja e lehtë me dashje" dhe "Prishja e qetësisë publike".