Inteligjenca amerikane ka zbuluar një tentativë të zyrtarëve rusë për të eliminuar kreun e një kompanie të fuqishme gjermane të prodhimit të armatimeve dhe pjesëve plotësuese për Ukrainën, Armin Papperger. Zyrtarët amerikanë dhe evropianë thonë se plani ishte pjesë e një serie vrasjesh të krerëve të industrisë së mbrojtjes në Evropë, që mbështesnin luftën në Ukrainë. Pas sinjalizimit nga SHBA, shërbimet sekrete gjermane kishin arritur të mbronin Papperger dhe goditur komplotin, shkruan CNN. Kompania e Papperger, Rheinmetall, është prodhuesja më e madhe e predhave 155mm me të cilat luftohet në konfliktin ku janë vrarë qindra mijëra njerëz. Kompania raportohet se është duke hapur një fabrikë prodhimi autoblindash brenda Ukrainës dhe ky fakt ka shqetësuar Rusinë. Komplotet ruse në vendet që mbështesin luftën në Ukrainë ishte pjesë e diskutimeve të zyrtarëve të NATO në Uashington për 75-vjetorin e aleancës, pasi disa zjarre të dyshimta janë raportuar në muajt e fundit në Gjermani, Poloni apo Francë.