Komisioni Federal i Komunikimeve në Shtetet e Bashkuara i hoqi kompanisë shtetërore kineze të telekomunikacionit, China Telecom të drejtën të operojë në Shtetet e Bashkuara, duke përmendur si arsye shqetësimet e sigurisë kombëtare. Filialit të kësaj kompanie, që vepron në SHBA prej 20 vjetësh, i janë dhënë 60 ditë kohë që të ndërprësë të gjitha shërbimet e saj atje. Sipas Komisionit, kontrolli i firmës nga qeveria kineze përbën "rrezik të konsiderueshëm ndaj sigurisë kombëtare dhe rendit", pasi i jep asaj mundësi qasjeje tek komunikimet e SHBA-së dhe ndërprerje të tyre dhe rrjedhimisht i hap rrugën përdorimit të informacionit “për spiunazh dhe aktivitete të tjera të dëmshme kundër Shteteve të Bashkuara." Një zëdhënës i China Telecom, kompania më e madhe e telekomunikacionit në Kinë, e cilësoi vendimin "zhgënjyes", e tha kompania planifikon "të ndjekë të gjitha alternativat në dispozicion duke vazhduar njëkohësisht t'u shërbejë klientëve." Kjo është masa më e fundit e marrë nga qeveria amerikane për të kufizuar qasjen në teknologjinë dhe tregjet amerikane për kompanitë kineze të telekomunikacionit, përpjekjë këto të cilat filluan që gjatë administratës së ish-presidentit Donald Trump.