Aleksandar Vucic u takua me shefin e Kremlinit, Vladimir Putin, dhe nuk kishte sesi mungonte as në këtë rast vlerësimi i presidentit serb për aleatin e fuqishëm. “ Cdo takim me presidentin e Federatës ruse, Vladimir Putin, ka rëndësi të jashtëzakonshme për shtetin tonë”, shkroi Vucic në Instagram, krahas një videoje ku shihej duke u përshëndetur me Putinin. Më herët, ai qe shprehur se në qendër të diskutimit do të ishin temat kryesore politike, bashkëpunimit tregtar dhe cmimi i gazit. Vucic u shpreh se do t`i lutej presidentit rus për çmim më të arsyeshëm të gazit, që në Serbi aktualisht paguhet 270 dollarë për 1 mijë metra kub. “E kam shqetësim të madh dhe përgjëgjesi të madhe, nuk e di nëse do të ketë mirëkuptim dhe do të miratojë çmim më të arsyeshëm të gazit”, ishte komenti i tij para takimit. Serbia varët tërësisht nga gazi rus. Marrëveshja e saj me "Gazprom" përfundon në fund të këtij viti e po zhvillohen negociata për marrëveshje të re. Presidenti serb që në 15 tetor kishte pohuar për radio-televizionin publik se pala ruse propozoi një çmim tre herë më të shtrenjtë krahasuar me atë aktual. Para udhëtimit në Rusi, Vuçic kishte deklaruar se ‘takimi me Putinin është shumë i rëndësishëm për Serbinë, dhe sqaroi se do të flasin për situatën në rajon, Kosovën dhe çfarë po ndodh në Ballkanin Perëndimor.