Presidenti i SHBA-së, Donald Trump pretendon se armëpushimi me Iranin vazhdon të mbetet në fuqi, pavarësisht përplasjeve të fundit në Ngushticën e Hormuzit, për të cilat të dyja palët fajësojnë njëra-tjeterën. SHBA-ja tha se Irani ka lëshuar raketa, dronë dhe anije të vogla kundër tre anijeve të saj luftarake, në atë që e quajti një "sulm të paarsyeshëm". Ndërkohë, krerër ushtarakë iranianë deklaruan se në fakt, Shtetet e Bashkuara kishin sulmuar një anijë cisterne të Iranit dhe kishin ndërmarrë "sulme ajrore" në disa zona bregdetare. Tensionet e reja vijnë një ditë pas deklaratës së ministrisë së jashtme të Iranit se po shqyrton propozimin amerikan që synon fundin e luftës. Në një shenjë tjetër të lëkundjes së armëpushimit, orët e para të ditës së sotme Ministria e Mbrojtjes e Emirateve të Bashkuara Arabe njoftoi se forcat e saj të mbrojtjes kishin ndërhyrë me urgjencë ndaj një sulmi me raketa dhe dronë nga Irani. Mediat shtetërore iraniane fillimisht raportuan për "shpërthime" në Ngushticën e Hormuzit, duke i përshkruar si një "shkëmbim zjarri" me "armikun". Sipas shtypit vendas, të cituar nga BBC, shpërthime janë dëgjuar edhe në Teheran. Pak më vonë, një deklaratë nga komanda e lartë ushtarake e republikës Islamike njoftoi se sulmet ajrore amerikane kishin goditur zona bregdetare të Bandar Khamir, Sirik dhe Ishullit Qeshm. Irani, sipas saj, reagoi menjëherë duke sulmuar anijet ushtarake amerikane e duke shkaktuar "dëme të konsiderueshme", dhe akuzoi SHBA-në për "shkelje të armëpushimit". Trump vetë, teksa foli në Truth Social për dëme të shkaktuara “sulmuesve iranianë” , gjithashtu përsëriti një paralajmërim mbi marrëveshjen e paqes: "Ashtu si i mposhtëm ata përsëri sot, do t’i mposhtim edhe më fort e më ashpërisht në të ardhmen, nëse nuk nënshkruajnë Marrëveshjen, SHPEJT!", ishte komenti i tij. Një burim izraelit i tha BBC-së se shteti hebre, nuk është përfshirë në sulmet e fundit. Rritja e tensioneve vjen pavarësisht nga deklaratat e presidentit amerikan në ditët e fundit se lufta me Iranin do të "përfundojë shpejt".