Nënstacioni elektrik në Vallaç është një prej pikave që i furnizon me energji elektrike katër komunat me shumicë serbe në veri të Kosovës dhe hidrocentralin e Ujmanit, dhe i takon rrjetit të shpërndarjes së Kosovës edhe sipas Marrëveshjes së Brukselit për energjinë të vitit 2013 dhe asaj të vitit 2015. Por ai është i vjetër si nënstacion dhe ka nevojë të rehabilitohet, thonë zyrtarë vendas për RFE, pa dhënë megjithatë detaje se kur mund të realizohet plani i rivitalizimit dhe në çfarë mënyre. Rrjeti Elektrik i Serbisë sakaq pretendon se çështja e energjisë në veri të Kosovës është më tepër se kaq, duke e konsideruar një problem kompleks edhe politik e juridik si dhe një objekt negociatash. Sipas këtij rrjeti, punëtorët në nënstacionin e Vallaçit paguhen prej tyre. Çështja për nënstacionin e Vallaçit u riaktualizua nga presidenti i Serbisë, Aleksandar Vuçic deklaroi se pret që autoritetet e Kosovës të provojnë së shpejti të marrin në kontroll nënstacionin elektrik. Vucic shtoi se Prishtina do ta zgjedhë vete momentin kur do ta bëjë këtë, por i kërkoi që të mos e hedhë këtë hap duke lënë të kuptohet se në të kundërt, Serbia do të reagojë.