Demokratët zgjodhën përfaqësuesit e tyre për parlamentaret e 2025. Pas primareve të mbajtura të shtunën, PD publikoi shifrat e pjesëmarrjes ku votuan gjithsej 50 854 anëtarë. Për Partinë Demokratike këto numra janë më pozitivet në historinë e kësaj force politike në lidhje me pjesëmarrjen më të lartë në proceset zgjedhore të brendshme. Të dhënat tregojnë se numri më i madh i votuesve u shënua në Tiranë me 13 052 demokratë, më pas renditen Durrësi, Korça, Fieri dhe Shkodra. Por kush janë kandidatët më të votuar? Burimet e Top Channel nxjerrin një panoramë paraprake të fituesve nëpër Shqipëri, teksa në Tiranë ende nuk janë zbuluar kandidatët demokratë më të votuar. Me përfundimin e numërimit në qarkun e Kukësit, në vend të parë rezulton të jetë mjeku hasjan Shkëlzen Ibra me 707 vota, teksa deputeti aktual Isuf Çelaj ka zënë vendin e katërt me 410 vota. Në qarkun e Dibrës ka kryesuar kryetari i degës së PD në degën e Dibrës Ilir Krosi me 578 vota, pasuar nga Denisa Vata, Basir Collaku, Ismail Uka dhe Përparim Spahiu, ndërsa deputeti aktual Kreshnik Collaku renditet në vendin e 11 me 68 vota. Në Lezhë vendin e parë e z ëish kryetari i degës së PD, ish gjyqtari Gjin Gjoni me 674 vota, ndjekur nga Aleksandër Lala dhe në vend të tretë Elda Hoti me 394 vota. Ndryshe është rezultati në qarkun e Korçës, ku demokratët kanë besuar sërish deputetët Bledion Nallbatin me 1219 vota dhe Edmond Spaho me 691 vota. Përfundimi i numërimit në qarkun e Durrës tregon se më i votuari është ish-kandidati për kryetar bashkie, Igli Cara me 622 vota,teksa zëdhënësja e Berishës, Floriana Garo është votuar vetëm nga 32 demokratë. Në Gjirokastër Alma Kore renditet e para, ndërsa në vend të tretë Arben Ristani me 317 vota. Në Bashkinë e Shkodrës demokratët kanë votuar më shumë ish kryebashkuan Bardh Spahia me 380 vota. Ndërsa në bashkinë e Malësisë së Madhe rezulton të jetë më i votuari deputeti Ramadan Likaj. Në qarkun e Vlorës kryeson deputetja Ina Zhupa me 765 vota, ndjekur nga Atird Hoxha dhe Manjola Nikollo. Deri më tani duket se nga 37 kandidatë, vetëm 13 e kanë kaluar pragun e votave të vendosur nga PD. Të sigurtë pa u ndikuar nga procesi i primareve janë drejtuesit politikë të qarqeve, emrat e të cilëve janë në listat e mbyllura të PD. Ndërsa pritet që të dhënat përfundimtare në 12 qarqet për primaret e 2025 të shpallen zyrtarisht me një njoftim për shtyp nga selia blu.