Aleatët e NATO-s po i vendosin forcat e tyre në gjendje gatishmërie dhe janë duke dërguar përforcime në lindje të Europës si përgjigje ndaj grumbullimit të më shumë se 100.000 trupave ruse pranë kufirit me Ukrainën. Por nëse konflikti shpëthen vërtet, a do t’i dalë NATO-ja në Mbrojtje Ukrainës? Jo ushtarakisht, thotë Reuters. Ukraina nuk është anëtare e NATO-s dhe aleanca nuk është e detyruar me traktat për ta mbrojtur këtë shtet. Presidenti i ShBA-së, Joe Biden, ka thënë se nuk do dërgojë trupa amerikane ose trupa aleate për të luftuar kundër Rusisë në Ukrainë. Për momentin, aleanca me 30 shtete është duke punuar me Ukrainën për të modernizuar forcat e saj të armatosura. Kanadaja drejton një program trajnimesh në Ukrainë, ndërsa Danimarka gjithashtu është duke i shtuar përpjekjet që ta afrojë ushtrinë ukrainase me standardet e NATO-s. Nga ana tjetër, Shtetet e Bashkuara, Britania e Madhe dhe shtetet baltike po dërgojnë armë në Ukrainë, përfshirë raketat anti-tank, armët e vogla dhe barkat. Po atëherë, përse po vihen në gatishmëri trupat e NATO-s? Kjo duket po ndodh për shkak se aleanca është e shqetësuar nga përhapja e mundshme e një konflikti mes Rusisë e Ukrainës, sidomos në Detin Baltik dhe në rajonin e Detit të Zi, ku Rusia e aneksoi Krimenë më 2014. Eksperti amerikan i politikës së jashtme, Michael O'Hanlon mendon sidoqoftë se rreziku i luftës është në të vërtetë shumë më i vogël nga sa mund të mendohet. Ai është i bindur se Putini kërkon thjesht të ushtrojë presion që Ukraina të mos anëtarësohet në NATO.