Vetëm në vitin 2021 në Amerikën Qendrore janë kapur të paktën 250 ton droga, një shifër rekord e nxitur nga prodhimi i kokainës. "Ka më shumë droga se kurrë që vijnë nga Amerika Jugore", thotë ministri i brendshëm i Panamasë në një intervistë me AFP. Nga sekuestrimet 200 ton ishin kokainë dhe pjesa tjetër kryesisht marijuanë, sipas llogaritjeve zyrtare. Konfiskimet kalojnë me 38% sasinë prej 180 ton që u kapën në 2020, sipas shifrave të OKB. Sot policia anti-droga e Kolumbisë ka sekuestruar një dërgesë prej 20,000 arra kokosi të mbushura me kokainë të lëngshme, pak para se të nisej drejt Evropës. Kapja u bë në portin e Cartagena, në brigjet kolumbiane të detit të Karaibeve, nga ku arrat e kokosit po niseshin drejt Genoas në Itali. Prokuroria dhe njësia anti-droga e Kolumbisë zbuluan se qumështi natyral i arrës së kokosit ishte zëvendësuar me një lëng që ishte injektuar brenda kokrrave.