Prokurori i Përgjithshëm, Olsian Çela ka prezantuar raportin e vitit 2022 në Këshillin e Lartë të Prokurorisë, duke theksuar se është kryer një punë mjaft e mirë për arritjen e një sërë objektivash. Sipas Çelës, institucioni që ai drejton iu ka dhënë rëndësi rekomandimeve prioritare të Këshillit të Ministrave “Për luftën kundër kriminalitetit për vitin 2022”. Sakaq, në kuadrin e hartës së re gjyqësore, Prokuroria e Përgjthshme në bashkërendim dhe koordinim me Këshillin e Lartë Gjyqësor, Këshillin e Lartë të Prokurorisë dhe Ministrinë e Drejtësisë, është angazhuar dhe ka kontribuar në fazën përgatitore, si një nevojë e domosdoshme në kushtet aktuale të gjendjes së shkaktuar nga vakancat në sistemin e prokurorisë, për të mundësuar rritjen e kapaciteteve institucionale dhe profesionale në prokurori, si dhe për të mundësuar rritjen e kapaciteteve akomoduese me ambjente pune për prokurorët, oficerët e policisë gjyqësore të seksioneve, administratën dhe shërbimet mbështetëse, si dhe përdorimin me efektivitet të fondeve buxhetore për përmirësimin e infrastrukturës.