“Gjatë vitit 2024, ekonomia shqiptare ishte një nga ekonomitë që pësoi rritjen më të shpejtë në Evropë, bazuar te turizmi dhe politikat makroekonomike të kujdesshme”! Është ky konkluzioni i Fondit Monetar Ndërkombëtar, në raportin për Shqipërinë, të publikuar këtë të hënë, i cili vlerëson se perspektivat e rritjes së ekonomisë shqiptare pritet të mbeten të fuqishme. “Në vitet 2024-2029 rritja ekonomike parashikohet të jetë rreth 3.5 për qind, e nxitur nga konsumi i brendshëm, turizmi dhe ndërtimtaria, ndërsa në fund të vitit 2024 inflacioni pritet të jetë rreth 2 për qind, një pikë poshtë objektivit të Bankës së Shqipërisë”. Raporti thekson më tej se autoritetet pritet të tejkalojnë objektivin e tyre buxhetor; nga 0.3 për qind e PBB-së, parashikohet që teprica të shkojë në 0.5 për qind e PBB-së, ndërsa buxheti i vitit 2025 synon një bilanc parësor zero, ndërkohë që të ardhurat vlerësohet se janë në rrugën e duhur. FMN vlerëson se politikat e kujdesshme fiskale ndihmuan në reduktimin e borxhit publik, i cili, siç parashikohet në raport, pritet të bjerë në rreth 50% në vitin 2029. Në raportin e FMN, vihet theksi edhe te vështirësitë, me të cilat po përballet ekonomia shqiptare, si plakja e shpejtë e popullsisë, emigrimi apo prodhimtaria e ulët. “Pavarësisht nga pamja optimiste makroekonomike, mbeten sfida të konsiderueshme strukturore. GDP-ja për frymë qëndron në rreth një të katërtën e niveleve të SHBA-së dhe BE-së, ndërsa po ndodhin plakja e shpejtë dhe emigrimi. Nevojitet të ndërmerren reforma të gjera, në përmirësimin e qeverisjes, menaxhimin e financave publike, në rritjen e kapitalit njerëzor dhe prodhimtarisë për të nxitur një rritje më të qëndrueshme afatgjatë”. Në fund, FMN rendit si burime rreziku për ekonominë ekspozimet ndaj huamarrësve të mëdhenj dhe bankave, zgjerimin e shpejtë të kreditimit nga bankat për sektorin e pasurive të paluajtshme, i cili ka shënuar një rritje të vazhdueshme të çmimeve dhe përbën dy të tretat e kredive të pambrojtura në valutë.