Shqipëria do të arrijë të mbyll negociatat në 2027, pas përfundimit të celjes së grupkapitujve dhe hapjes së fazës së re të mbylljes së tyre, ishte shënimi i fundjavës i kryeministrit Edi Rama në podcastin Flasim. Ai e cilësoi këtë moment historik, që e afron drejt objektivit madhor të anëtarësimit në BE në 2030. “Më 26 maj, Shqipëria u ngjit në pikën më të lartë ndonjëherë në këtë të përpjetë të mundimshme historike. Është domethënëse që Bashkimi Europian konfirmon faktin e përmbushjes së suksesshme të të gjitha detyrave të deritanishme, pikërisht në ato fusha që lidhen me drejtësinë, me luftën kundër korrupsionit dhe me funksionimin e institucioneve demokratike, dhe sa një arsye për të qenë krenarë, aq edhe një arsye për të ndjerë të gjithë peshën e përgjegjësisë në këtë fazë të fundit”.