Konferenca Ndërqeveritare Shqipëri-BE pritet të vulosë përmbylljen me sukses të fazës hyrëse të negociatave për anëtarësimin e Shqipërisë në Bashkimin Europian. Në shënimet e javës Kryeministri Edi Rama e konsideron këtë një tjetër hap të rëndësishëm drejt anëtarësimit të vendit në Bashkimin Europian “Më 26 maj, në Bruksel, Konferenca Ndërqeveritare Shqipëri-Bashkimi Europian vulos përmbylljen me sukses të fazës hyrëse dhe hap fazën përfundimtare të negociatave për anëtarësimin e Shqipërisë në Bashkimin Europian. Kemi ngjitur një tjetër lartësi të vështirë drejt majës, ku do të arrijmë me çdo kusht brenda kësaj dekade dhe ku do të vendosim flamurin e Skënderbeut dhe të Ismail Qemalit aty, në oborrin e shtëpisë së madhe të Europës së Bashkuar.” Kryeministri Rama tha se ballafaqimi mori kohën e vet ndërkohë që “molotovarët e Tiranës” gëzoheshin dhe digjnin kryeqytetin për ta zhgarravitur Shqipërinë në sytë e partnerëve tanë.