Presidenti rus, Vladimir Putin deklaroi se ka disa "ndryshime pozitive" në bisedimet ndërmjet Rusisë dhe Ukrainës. “Këtë më raportuan negociatorët tanë, negociatat tani po zhvillohen pothuajse çdo ditë", tha ai gjatë një takimi me homologun bjellorus, Alexander Lukashenko në Moskë.Negociatorët rusë dhe ukrainas kanë mbajtur disa runde bisedimesh që kur Putini dërgoi trupa në Ukrainë, më 24 shkurt. Bisedimet kanë çuar në hapjen e disa korridoreve humanitare për evakuimin e civilëve nga zonat e luftimit. Por këto përpjekje kanë pasur bllokime të vazhdueshme, e për këtë palët, kanë ë akuzuar njëra-tjetrën për bllokimin e këtyre përpjekjeve. Putini premtoi se do ta mbajë të "informuar" aleatin e tij, Lukashenko, mbi ecurinë e bisedimeve. Kremlini deklaroi më herët se konflikti në Ukrainë do të përfundojë kur Perëndimi të ndërmarrë veprime lidhur me shqetësimet e ngritura vazhdimisht nga Rusia për vrasjen e civilëve në lindje të Ukrainës dhe zgjerimin e NATO-s drejt lindjes. Zëdhënësi i tij, Dmitry Peskov, u shpreh se besonte që Ukraina po diskutonte për kërkesat e Moskës me Shtetet e Bashkuara dhe aleatët e tjerë. "Rusia formuloi kërkesa konkrete ndaj Ukrainës për t'i zgjidhur këto çështje. Me sa kuptojmë, ato kërkesa po diskutohen nga ukrainasit me këshilltarët e tyre, kryesisht Shtetet e Bashkuara dhe vendet e Bashkimit Evropian", tha ai.