Perëndimi do të hyjë në luftë të drejtpërdrejtë me Rusinë, nëse do të lejojë Ukrainën të sulmojë tokën ruse me raketat me rreze të gjatë veprimi që ai i ka siguruar: Në komentet e tij më të ashpra deri më tani mbi këtë cështje, shefi i Kremlinit, Vladimir Putin paralajmëroi konflikt të hapur me argumentin se të dhënat satelitore për shënjestërim dhe programet për rrugët e fluturimit të raketave do të duhej të kryheshin nga personeli ushtarak i NATO-s, meqë Kievi nuk ka mundësi ta bëjë këtë vetë. Nuk bëhet fjalë thjesht dhe vetëm për ta lejuar apo jo regjimin ukrainas ta godasë Rusinë me këto armë. Çështja është a të merret vendim për t’i lejuar apo jo vendet e NATO-s të përfshihen drejtpërdrejt në një konflikt ushtarak. Nëse vendimi merret, kjo do nënkuptojë një përfshirje të drejtpërdrejtë të vendeve të NATO-s, Shteteve të Bashkuara dhe vendeve europiane në luftën në Ukrainë. Një gjë e tillë, natyrisht, do ta ndryshojë dukshëm natyrën e konfliktit.