Me mina me telekomandë e lëndë eksplozive, një 45 vjeçar u prangos nga policia në hyrje të qytetit të Rrëshenit. Arili Kalija u arrestua gjatë operacioni të koduar “Safe City 2”, I cili u zhvillua pas informacioneve të siguruara nga strukturat e inteligjencës se ai po transportonte lëndë plasëse nga zona e Dibrës. Gjatë kontrollit fizik të ushtruar ndaj 45-vjeçarit nga Kruja, Policia gjeti 4 mina me telekomandë te lidhura me aparat celular me lëndë të dyshuara eksplozive; 3 kallëpë eksplozive me kapsollë dhe fitil; 3 kapsolla të lidhura me fitil; si dhe 2 kallepë të tjera eksplozive. Lënda plasëse dyshohet se do t’u shitej grupeve kriminale. Ndërkohë gjatë kontrollit të ushtruar në banesën e babait të 45-vjeçarit në fshatin Lurë të qarkut Dibër uniformat blu zbuluan 2 armë zjarri, lëndë eksplozive, kapsolla detonatore, qindra fishekë luftarak dhe fitil zjarrpërcjellës. Lidhur me rastin hetuesit po vijojnë punën për identifikimin dhe kapjen e personave të tjerë të përfshirë në këtë veprimtari kriminale. Dy muaj e gjysmë më parë, Policia arrestoi dhe një 28-vjecar, pasi u kap me dy mina me telekomandë.