Pak pasi SHBA shkatërroi një anije që dyshohej se transportonte drogë nga Venezuela, dy avionë të ushtrisë venezueljane sipas Pentagonit kanë fluturuar shumë afër një një anijeje të Marinës të Shteteve të Bashkuara në ujëra ndërkombëtare “në një lëvizje jashtëzakonisht provokuese”. Njoftimi i ministrisë amerikane të mbrojtjes përbën një përshkallëzim të ri në tensionet që janë rritur lidhur me dislokimin e anijeve nga Uashingtoni në Karaibe. “E këshillojmë me force kartelin që udhëheq Venezuelën, të mos ndërmarrë asnjë përpjekje tjetër për të penguar ose ndërhyrë në operacionet kundër narkotikëve dhe kundër terrorizmit të kryera nga ushtria amerikane”, paralajmëroi Departamenti i Mbrojtjes i SHBA-së përmes një postimi në platformën X. Uashingtoni ka dislokuar luftanije në jug të Karaibeve, teksa tensionet janë ashpersuar mes presidentit amerikan, Donald Trump, dhe udhëheqësit të Venezuelës, Nicolas Maduro, të cilin SHBA-ja e akuzon se udhëheq një kartel të drogës. Sipas Trumpit, anija e vogël e sulmuar të martën e që besohet se transportonte klëndë narkotike në Karaibe, i përkiste Tren de Aragua të cilën Shtetet e Bashkuara e kanë listuar si organizatë terroriste dhe që kreu i administratës amerikane e lidh me Maduron. Si pasojë e këtij sulmi, u vranë 11 persona.