Qeveria e Polonisë ka vendosur të vijojë ndalesën e importeve të drithërave ukrainase në mënyrë të njëanshme, pavarësisht përfundimit të kufizimeve aktuale të Bashkimit Evropian pas tre ditësh. “Pavarësisht vendimit të ri të Komisionit Evropian, ne nuk do të hapim kufirin për drithërat ukrainase pas asaj date”, njoftoi Qeveria përmes një deklarate. Në njoftim u tha se Qeveria e Polonisë po shikon mundësinë që të zgjasë ndalimin edhe tek anëtarët e BE-së, por nëse nuk ndodh kjo, atëherë vendimi do të vlejë vetëm për shtetin polak. Konflikti në Ukrainë dhe problemet me eksportet e drithërave ukrainase përmes Detit të Zi ka bërë që BE-ja të shndërrohet në një rrugë të rëndësishme për transit dhe një destinacion për eksportet e drithërave ukrainase. Në qershor, BE-ja u pajtua të kufizonte importet e drithërave nga Ukraina pasi pesë shtete të bllokut morën masa për të mbrojtur fermerët e tyre, të cilët u ankuan se importet ukrainase po shiteshin me çmim shumë më të lirë në tregjet lokale. Bullgaria, Hungaria, Polonia, Rumania dhe Sllovakia kanë kërkuar që kufizimet, që skadojnë të premten, të zgjaten.