Presidenti amerikan, Donald Trump, ka deklaruar të martën se “pothuajse gjithçka është shkatërruar në Iran”. Trumpi e ka bërë deklaratën gjatë një takimi në Zyrën Ovale me kancelarin gjerman, Friedrich Merz. Ndërkaq, lidhur me pyetjen e një gazetari se nëse Izraeli e ka detyruar atë të sulmojë Iranin, Trumpi ka thënë se ka ndodhur pikërisht e kundërta. “Jo, mund t'a kem detyruar unë Izraelin të sulmojë. Sa për Iranin, po ju them se ne po zhvillonim negociata me këta të çmendur dhe mendimi im ishte se ata do të sulmonin të parët. Nuk doja që kjo të ndodhte”. Trumpi është pyetur edhe lidhur përgjigjen e aleatëve të tjerë të SHBA-së për operacionin ndaj Iranit. Ai ka kritikuar si kurrë më parë kryeministrin britanik Sir Keir Starmer. "Nuk kemi të bëjmë me Winston Churchill. Nuk jam i kënaqur me Mbretërinë e Bashkuar" tha ai për shkak të refuzimit fillestar nga Londra për të lejuar Uashingtonin të përdorë bazën britanike në Oqeanin Indian gjatë sulmeve të para ndaj Iranit. Ai njoftoi se Shtetet e Bashkuara do t’i ndërpresin marrëdhëniet tregtare me Spanjën. “Do ta ndërpresim gjithë tregtinë me Spanjën. Nuk duam të kemi asgjë me ta. Spanja ishte e tmerrshme gjatë këtyre ditëve sepse na tha se nuk mund t’i përdornim bazat e tyre. Ishin shumë armiqësorë. Spanja nuk ka absolutisht asgjë që na duhet, përveç njerëzve të mrekullueshëm. Po, kanë njerëz të mrekullueshëm, por nuk kanë udhëheqje të mirë. Megjithatë, nëse duam të përdorim bazat e tyre, mund të zbarkojmë atje dhe t'i përdorim. Askush nuk do të na thotë se nuk mund t'i përdorim” Spanja u përgjigj duke thënë se nëse Washingtoni dëshiron ta shqyrtojë marrëdhënien tregtare me Spanjën “duhet ta bëjë këtë duke respektuar autonominë e kompanive private, ligjshmërinë ndërkombëtare dhe marrëveshjet bilaterale mes BE-së dhe SHBA-së”.